Fundarstjóri var Sólveig Pétursdóttir, formaður nefndar Sjálfstæðisflokksins um sveitarstjórnar- og skipulagmál.
Mættir voru: Sigríður Margrét Oddsdóttir, formaður verhóps, Katrín Olga Jóhannesdóttir, varaformaður, Sólveig Pétursdóttir, Vilhjálmur Egilsson, Arna Hauksdóttir, Steingrímur Sigurjónsson, Júlíus Vífill Ingvarsson, Stefanía Katrín Karlsdóttir, Arngrímur Pálmason, Elínbjörg Magnúsdóttir, Sigurrós Þorgrímsdóttir, Þorleifur V. Sigurðsson, Viðar Guðjohnsen, Pawel Bartoszek, Grazyna María Okuniewska, Jóhann Heiðar Jóhannsson, Jóhannes Runólfsson, Elías J. Bjarnason, Þorbjörg Helga Vigfúsdóttir, Pétur Stefánsson, Höskuldur Marselíusarson, Borghildur Maack, Elías Bjarnason og Skapti Örn Ólafsson.
Fundarstjóri opnaði fundinn og bauð gesti velkomna. Tilkynnti hún að Halldór Halldórsson, formaður Sambands íslenskra sveitarfélaga, hefði forfallast, en hann hafði fyrirhugað að vera með erindi á fundinum.
Fóru Katrín og Sigríður Margrét yfir vinnumarkaðs- og byggðamálin. Kom fram í máli þeirra að búið væri að tala við marga er tengjast þessum málaflokkum. Kynntu þær fyrstu drög nefndarinnar sem hægt er að nálgast hér á síðunni.
Katrín Olga kynnti heimasíðuna og hvernig hún er byggð upp. Hvatti hún fundarmenn til að taka þátt í umræðunni á síðunni og kynna sér þau gögn sem nú þegar eru komin inn á síðuna.
Gestur fundarins, Vilhjálmur Egilsson, framkvæmdastjóri Samtaka atvinnulífsins, var næstur í pontu, og var með áhugavert erindi um vinnumarkaðsmál.
Vilhjálmur lýsti hvernig hann upplifir stöðu mála í dag og hvernig hann sér hlutina fyrir sér í framtíðinni. Sagði hann útgangspunktinn vera að Ísland sé hluti af samevrópskum vinnumarkaði í gegnum EES. Aðild að ESB myndi litlu bæta við þá stöðu sem uppi er í dag hvað varðar vinnumarkaðinn. Sagði Vilhjálmur að ESS samningurinn héldi ágætlega í dag.
Þá fjallaði Vilhjálmur um byggðamálin, en er hann starfaði hjá Verslunarráði Íslands og sat á Alþingi vann hann mikið að byggðamálum og þekkir því vel til. Sagði hann að innan ESB væri mjög skipulega tekið á byggðamálum.
Ræddi Vilhjálmur um styrkjamál og ESB og reynslu Íra af sambandinu.
Í máli Vilhjálms kom fram að líklega myndi Ísland borga meira fyrir inngöngu í ESB en það fengi út úr sambandinu. Menn yrðu að gera sér grein fyrir því að aðgangurinn er ekki ókeypis. Þá sagði hann að mikilvægt væri að gera sér grein fyrir því að ESB leysir engan vanda, við yrðum að gera það sjálf. ESB gæti hjálpað til, en við íslendingar þyrftum samt sem áður sjálf að standa á eigin fótum.
Þakkaði fundarstjóri Vilhjálmi fyrir áhugavert og gott erindi.
Fundarstjóri sagði þvínæst frá heimsókn Halldórs Halldórssonar, formanns Sambands íslenskra sveitarfélaga, í sveitarstjórnar- og skipulagsnefnd Sjálfstæðisflokksins á dögunum. Þar sagði hann frá því að nú þegar væru sveitarstjórnarmenn í miklu samstarfi við ESB. Kom fram í máli Halldórs að skipulagsmál myndu ekki breytast mikið við inngöngu í ESB, þar sem regluverkið í skipulagsmálum væri mismunandi eftir löndum.
Þvínæst opnaði fundarstjóri fyrir spurningar.
Líflegar umræður spunnust og fjölmargar fyrirspurnir og ábendingar bárust. Meðal umræðuefna voru:
- Frjálst flæði vinnuafls
- Hvort Ísland eigi að horfa í aðrar áttir en til ESB
- Sameiginlegt skattaumhverfi innan ESB
- Lissabonsáttmálinn
- Gjaldmiðlamálin
Þakkaði fundarstjóri fyrir góðan fund.
Fleira ekki gert og fundi slitið klukkan 17:45.
Fundargerð ritaði Skapti Örn Ólafsson.
Ég var á fundi Evrópunefndar þann 17.des.sl. Vilhjálmur Egilsson flutti þar erindi.
Ég bar upp - hér - eftir farandi fyrirspurn á fundinum - EN þar sem fyrirspurn mín kom ekki fram í fundargerð - finnst mér mikilvægt að hún komi fram hér -
þar sem efnislegt innihald fyrirspurnarinnar er mjög mikilvægt fyrir umræðu um Evrópusambandsaðild - og mér - vitanlega hefur ekki verið inni í umræðunni né heldur í skrifuðu efni.
Fyrirspurn:Getur þjóð sem verið hefur inni í Evrópusambandinu - sagt sig frá aðild og gengið úr sambandinu ?
Vilhjálmur svaraði því til að - úrsögn úr Evrópusambandinu - teldist ófær leið.
Frekari efnisleg umfjöllun væri gagnleg - um þetta efni.